Van Chintceche na Dodoma

Van Chintheche ry ons na Muzuzu om die Trok se airconditioner te laat reg maak, geld te trek en petrol in te gooi. Ons betaal 30 000 Mkw vir 44 liter petrol. Ons besluit om op Karonga te gaan slaap. Net voor die grens na Tanzanie. Ons ry verby plantasies en stop om te kyk hoe hulle rubber uit die bome tap. Langs die pad verkoop hulle balle wat hulle van die rubber maak. Die omgewing raak al meer bergagtig en ons begin die eerste kameeldoringbome kry.

Die volgende dag gaan ons oor die grens na Tanzanie. Die mense by die grens is baie vriendelik en vertel ons dat Suid Afrikaners van die volgende dag (1 Julie) nie meer visums nodig het vir Tanzanie nie. Ons ruil geld op die grens en kry 150 000TSh vir $100. 1Rand = 150 TSH. Petrol is darem nou weer so R13/l.

Nou raak die fietse al minder en die motorfietse al meer. Ons begin klim in die berge in tot ‘n hoogte van 2276m. Ons ry deur ‘n baie mooi bergpas met Lake Malawi weer voor ons. Hier begin die mense rys plant en met Tuk – Tuks ry. Toe slaan ons die padwerke. Die mense se ‘stop and go’ is nie 10 min soos in RSA nie, maar amper ‘n uur en dan druk jy in tot iemand stop! Ons slaap vanaand by The Farmhouse op die plaas Kisolanza. Skielik is dit weer vriesend koud. Nicky(die eienares van die plaas) beveel aan dat ons die volgende dag na Ruaha National Park toe gaan so 200km verder.

Dit raak nou al vroeer lig en ons ry die volgende oggend eers Iringa  en daarna Ruaha toe. Ons slaap by Chogela Camping Site net buite die park vir R100 pp. Die aand word ons eers aangeval deur die grootste rooi miere wat ek nog gesien het en toe kom die muskiete!  Ons besluit om die volgende dag die sowat R800 pp te betaal om in die park in te gaan en die aand langs die rivier te gaan kamp. Dit is nie veel  van ‘n kampplek nie en die diere loop vrylik rond , maar dis pragtig langs die rivier. Dis te warm om diere te kyk en die koelte is maar min. Om af te koel besluit ons om in die rivier te swem. Ons maak beurte om wag te hou vir die Seekoeie wat so 150m verder in die rivier op vir ons staan en kyk! Die middag laat gaan soek ons die diere. Net toe ons besluit die prys is bietjie hoog vir wat jy kry, ry ons ons vas in ‘n trop leeus! Die swem saam met die Hippo’s en die leeus het dit egter die moeite werd gemaak. Ons gaan slaap vroeg en luister  hoe die olifante en die seekoeie in die rivier raas,

Woensdagoggend ry ons Dodoma (Hoofstad van Tanzanie) toe. Die hele 260km is ‘n tipe grondpad langs die hoofpad wat die Chinese besig is om te bou. By tye ry ons 25km/h en die stof is iets vreeslik.  In Dodoma besluit ons ,ons moet onsself bederf en bly vanaand in die New Dodoma Hotel. Ons het heerlik gee et  en  uiteindelik het ons WiFi!